wong jowo

Yen sira kasinungan ngelmu kang marakake akeh wong seneng, aja sira malah rumangsa pinter, jalaran menawa Gusti mundhut bali ngelmu kang marakake sira kaloka iku, sira uga banjur kaya wong sejene, malah bisa aji godhong jati aking.(Bila anda mendapat anugrah ilmu yang membuat banyak orang senang, janganlah kamu merasa pintar, sebab apabila Tuhan mengambil lagi ilmu yang menyebabkan anda terkenal itu, anda akan menjadi orang biasa lagi, malah lebih bermanfaat daun yang kering)

Showing posts with label Pidato Bahasa Jawa (Sesorah). Show all posts

Wednesday, August 6, 2014

pidato bahasa jawa

TANGGAP WACANA

PEPISAHAN SAKING WAKIL MURID

Assalamu’alaikum wr wb

Alhamdulillahirobbil’aalamin, wabihii nasta’iinu ‘alaa umuurid dun-ya wad diin. Was shalaatu was salaamu ‘alaa sayyidil mursaliin. Sayyidinaa wa maulaana muhammadin wa’alaa ‘aalihiiwa sahbihi ajma’iin amma ba’du.

Bapak kepala sekolah ingkang dahat kula kurmati, Bapak/Ibu Guru ingkang dahat kinurmatan. Rencang saha adhik-adhik ingkang kula tresnani.

Puja-puji syukur dhumateng Gusti ingkang Mahaagung, ingkang sampun angluberaken rahmat sarta hidayah. Dene kula panjenengan sami saged makempal wonten ing......(diisi tempat dimana dilaksanakan acara)...kangge ngawontenaken pepisahan.

Bapak/Ibu Guru ingkang dahat kinurmatan. Boten kantun kula minangka wakilipun putra-putri siswa kelas 6, ngaturaken agunging panuwun ingkang tanpa upami awit keikhlasan saha sih katresnan Bapak/Ibu Guru anggenipun nggulawenthah dhumateng para siswa.

Saengga saged ngrampungaken kewajiban ingkang sampun kalampahan sadangunipun.....(diisi berapa tahun)..tahun, kanthi pikantuk Serat Tandha Tamat Belajar.

Sadangunipun...(diisi berapa tahun lama sekolah)..tahun, kula ngangsu kawruh wonten ing pawiyatan...(diisi nama sekolah)..wonten ing panggulawenthahipun, ngantos wonten pangiketing batin saengga karengkuh putra-putri piyambak.

Bapak/Ibu Guru tuwin adhik-adhik ingkang satuhu kula kurmati saha kula tresnani. Sakedhap malih kula sarencang ninggalaken pawiyatan menika. Awrat anggen kula matur kados pundi raosipun nilar Bapak/Ibu saha adhik-adhik. Jaragan kawontenan kedah mekaten, pramila kapeksa kula kaliyan rencang-rencang nilaraken Bapak/Ibu saha adhik-adhik kelas. Sanadyan sampun pepisahan ingkang ateges tinebih ing netra, mawantu-wantu kula tansah nyenyuwun supados taksih celak ing panggalih.

Pawiyatan ingkang sampun matahun-matahun sampun tansah cecaketan kaliyan kula. Kula sarencang rumaos cuwa penggalih, badhe nilaraken pawiyatan menika. Kajarag kahanan saha kersaning Gusti. Panci wonten pepanggihan tamtu badhe wonten pepisahan. Menika kados sampun kinodrat boten kenging dipunewahi malih.

Kula sarencang kelas 6 ingkang badhe nilaraken pawiyatan menika tansah nyenyuwun lan ndedonga adhik-adhik sageda kasil anggenipun ngangsu kawruh wonten ing pawiyatan menika. Kula minangka wakilipun rencang kelas 6, tansah nyuwun gungan, mugi-mugi adhik-adhik sregep anggenipun sinau lan tansah ngaosi dhumateng Bapak Ibu Guru.

Boten kantun ugi kula dalah rencang kelas 6 tansah memuji dhumateng Gusti ingkang akarya jagad, supados Bapak/Ibu Guru saha adhik-adhik tansah pikantuk rohmating Gusti Allah Swt wilujeng boten wonten alangan punapa.

Kula kinten boten prayogi menawi atur pamitan menika kula pepanjang. Kula namung tansah nyuwun tambahing donga pangestu saking Bapak/Ibu Guru saha adhik-adhik. Sageda wilujeng saksampunipun medal saking pawiyatan menika lan sageda pikantuk SMP kangge ngangsu kawruh ngilmu ingkang langkung inggil.

Kula minangka wakil kelas 6 tansah nyuwun agunging panuwun ingkang tanpa upami. Semanten atur kula mbok bilih wonten kekiranganipun anggen kula matur, kula nyuwun agunging samudra pangaksami.

Akhirul kalam billahit taufiq wal hidayah

Wassalamu’alaikum wr. wb.

Tuesday, March 25, 2014

Tanggap Wacana Upacara Mitoni -Sesorah (pidato bhs Jawa)-

Ing ngisor iki tuladha teks pidato utawa tanggap wacana acara adat “Mitoni”. Coba gatekna bab isi lan urut-urutane tanggap wacana.

Mahardhikeng tyas ring kamardhikan

Nuwun
Dhumateng para sesepuh saha pinisepuh ingkang dahat kinurmatan,
Dhumateng pamangku gati ingkang kula urmati,
Dhumateng para tamu undangan ingkang minulya.

Langkung rumiyin sumangga kula lan penjenengan sedaya ngaturaken raos syukur dhumateng ngarsanipun Gusti Ingkang Murbeng Dumadi ingkang sampun maringi kasarasan sarta kalodhangan, saengga kita saged anjenengi acara ing wekdal menika inggih acara tingkepan utawi mitoni garwanipun bapak Zainul Ma’arif kanthi boten wonten alangan menapa-menapa. Mugi-mugi kemawon ing dalem kekempalan kita dinten samenika wonten manfaatipun. Amin.

Para rawuh ingkang kula urmati.
Panjenengan sedaya kaaturan rawuh ing wekdal menika, inggih boten sanes amargi raos syukuripun bapak Zainul Ma’arif dhumateng ngarsanipun Gusti, amargi sadangu mangun bale wisma sampun ngajeng-ajeng momongan utawi putra ing dalem kulawarganipun.
Samenika pangajeng-ajeng menika sampun kalampah kanthi tetenger mbobotipun garwanipun ingkang sampun ngancik pitung sasi. Pramila saking menika Bapak Zainul Ma’arif sakulawarga nyuwun donga pangestunipun saking para rawuh, supados jabang bayi ingkang taksih wonten madaran menika pinaringan selamet, semanten ugi ibunipun. Lan mugi-mugi anggenipun lair dipunparingi gancar, lancar, sarta selamet kekalihipun.

Para rawuh ingkang kinurmatan,
Mugia kita sedaya dados tiyang ingkang estu-estu ngabekti dhumateng tiyang sepuh kalih. Semanten ugi, mugi-mugi Bapak Zainul Ma’arif sakulawarga benjang dipunparingi putra ingkang tansah ngabekti marang tiyang sepuhipun, migunani tumrap nusa, bangsa sarta agami. Amin.
Cekap semanten saking kawula, minangka panutuping atur,

Nuwun

(Nana Diana; 23 Mei 2010)

Thursday, September 26, 2013

Tuladha cengkorongan Sesorah

Tuladha cengkorongan sesorah:
Sesorah Sukuran
a. Salam pambuka
b. Atur pakurmatan lan panyapa aruh (urut saka sing dikurmati dhewe)
c. Atur puji syukur
d. Atur pambuka
e. Isi/wigatine sesorah
f. Atur panyuwun/ajak-ajak jumbuh karo isine sesorah
g. Atur dedonga, pangajab lan njaluk pangapura
h. Salam panutuo

Wednesday, January 2, 2013

Panyandra Penganten

 
Panyandra
Binarung swaraning gendhing Kodhok Ngorek, risang panganten kakung sampun kawistara manjing ing gapuraning pawiwahan. Saksana ginarubyug kadang sentana warga wandawa mapag praptane risang panganten kakung. Dumugi papan ingkang tumuju juru ampil kendhaga saking risang panganten kakung miwah putri samya lambang Sekar Kalpataru Dewandaru minangka tandha pracihna bebukaning upacara panggih.
Lon-lonan tindaking risang panganten kekalih. Sangsaya cedhak sangsaya caket samya apagut tingal. Tempuking pandulu mbabar raos geter salebeting manah, mila datan  saranta risang panganten putri gya ambalang gantal dhumateng ing raka inggih risang panganten kakung. Amung sakedhaping netra risang penganten kakung ugi ambalang gantal dhateng risang panganten putri.

(Wonten candhakipun..)

Saturday, February 4, 2012

Sesorah Perpisahan Kelas (Pidato Perpisahan Kelas)

Assalamualaikum Warohmatullohi Wabarokatuh,

Ingkang dahat kinurmatan Bapak Kepala Sekolah … , Bapak Ibu guru, staf TU, lan kanca-kanca adhik-adhik sedaya ingkang kula tresnani.

Sepisan sumangga kita sedaya ngaturaken puji syukur dhumateng Gusti Allah ingkang sampun maringaken nikmat dhumateng kita sedaya, saengga kita sedaya saged kempal ing adicara perpisahan kelas 9 samenika. Kula siswa kelas 9 (?) ingkang tinanggenah guru kagem makili kanca-kanca kelas 9 ngaturaken matur nuwun dhumateng sedaya bapak ibu guru ingkang sampun nggulawenthah kula sakanca, dangunipun tigang warsa ing pawiyatan menika.

Kula sakanca badhe nyuwun pangestunipun supados kula sakanca saged dados tiyang ingkang migunani tumrap kulawarga, masyarakat, agami, nusa lan bangsa. Sejatosipun kula sakanca rumaos awrat sanget badhe nilaraken pawiyatan (sekolah) menika. Kula inggih gadhah sakedhik pesen kagem adhik-adhik kelas 7 lan 8 supados tansah sinau ingkang sregep supados saged mujudaken cita-citanipun.

Cekap semanten saking kula, menawi anggen kula sakanca gadhah kalepatan. Kula nyuwun agunge pangapunten dhumateng sedaya kemawon.

Nuwun,

Wassalamualaikum Warohmatullahi Wabarokatuh.

(Gambar kapendhet saking Google.com)

Tuesday, January 10, 2012

Tuladha Panatacara Pambagyaharja

Mahardikeng tyas ring kamardikan, nugraha miwah sih wilasanippun gusti ingkang maha agung, mugi anggung sumandha wonten ing jiwangga kita sawegung waradin sagung dumadi raharja niskala satuhu.

Mligi katur para rawuh ingkang hangrasuk agami islam assalamualaikum wr wb.

Para sesepuh myang pinisepuh ingkang pantes sinungkeman, para sanak kadang sentana warga pawong mitra ingkang tansah sinambrama ing pamboja, para rumaja putra rumaja putri ingkang tansah kinasih ing gusti, waradinipun dhumateng sangyaning para rawuh kakung putri wreda mudha minulya.

Minangka purwakaning atur, keparenga kula ngaturaken pambagya wilujeng, saha ngaturaken gunging panuwuningkang tanpa pepindhan tumrap karawuhan panjenengan sedaya.

Ing salajengipun, mugi kepareng kula angambali atur uninga, bilih wontenipun pajenengan sedaya karawuhaken wonten ing wismanipun Bapak ………..( pamangkugati / yang punya hajat ) ing ri kalenggahan punika, wigatos kasuwun pangestu saha kasuwun anjenengi anggenipun amiwaha putri warujunipun (putri ingkang angka tiga) ingkang asesilih ……….( nama pengantin putri) pikantuk putra panenggakipun Bapak ………..( ayah pengantin putra ) sekaliyan saking …………( almt asal pengantin putra ) ingkang akekasih ………….( nama pengantin putra )

Lumantar kanthi puja-puji panjenengan sedaya kasebat, mugi-mugi gusti ingkang maha tunggal aparing nugraha agung dhumateng pengantin kekalih minggahipun ingkang sami mangun bebesanan. Mugi saged ambabar karahayon. Guyub rukun rerentengan reruntungan anggenipun sami mangun bebrayan/balewisma enggal widodo nir ing sambekala. Kadumugen ingkang sinedya, ing satemah mahanani bagya mulya yuwana air batos, ing donya prapteng dlahan.

Boten kasupen Bapak …………(pamangku gati ) ngaturaken angunging panuwun ingkang tanpa pepindhan tumrap paringipun dana ingkang maneka warni, ingkang boten saged kaaturaken satunggal baka satunggal. Pamangku gati sekaliyan boten saged caos tetimbangan punapa-punapa. Kejawi among tansah nyenyuwun dhumateng gusti ingkang murbeng titah. Mugi kepareng anglunturaken sih nugraha dumateng panjenengan sedaya, satraju kaliyan sih kadarman panjenengan.

Ing wasana damar mancung cinupet semanten atur kula hambok bilih wonten muna muni tandhang graying kitaling subosita kula titah sak wantah nyuwun agunging samudra pangapsami.

(Kapundhut saking tuladha medhar sabda panatacara mata kuliah berbicara asuhan Rama alm. Trontong Sadewa Unnes Semarang 2007)

Tuladha Panampi Pahargyan Midodareni

Mahardikeng tyas ring kamardikan nugraha miwah sih wilasanipun gusti ingkang maha agung mugi anggung sumandha wonten ing jiwangga kita sawegung waradin sagung dumadi, raharja, niskala satuhu.

Tumrap para kadhang muslimin, muslimat, asalamualaikum Wr. Wb.

Minangka talangbasanipun bapak WISNU WARDANA sekaliyan keparenga kula pun WAHYU HASTANTO ngempil kamardikan para rawuh saperlu ananggapi pangandikan bapak WISNU WARDANA sekaliyan ingkang lumantar bapak ZAENURI

Bapak ZAENURI ingkang kinurmatan,

Trajuning sih saking bapak WISNU WARDANA sekaliyan ingkang sampun rawuh Ing ngriki satuhu adamel bombong sarta mongkokipun bapak ABDUL NGOFUR sekaliyan.

Ingkang punika lumantar kula bapak ABDUL NGOFUR sekaliyan ngaturaken panuwun ingkang tanpa pepindhan.

Salajengipun ugi sampun kula tampi salam taklim saking bapak WISNU WARDANA sekaliyan tumunten badhe kula aturaken dhumateng bapak ABDUL NGOFUR sekaliyan

Bapak ZAENURI ingkang minulyeng budhi rawuh panjenengan ingkang sampun anganthi calon pengatin priya pun dimas bagus HERU PRASETYA .adamel suka gembira manahipun bapak WISNU WARDANA sekaliyan pramila kanthi raos bombong katampi pasrahipun calon penganten priya.

Ugi ngaturaken panuwun igkang tanpa upami tumrap sedaya sih peparingipun mugi hamimbuhi manunggaling tekad badhe sesarengan ngumpulaken balung apiah lumantar bebesanan. Salajengipun dhumateng bapak ZAENURI sakadang sumangga panjenengan sedaya kula dhereaken lelenggahan sinambi paring pangestu mugi calon pengatin anggenipun badhe nglampahi daup silakrama benjang enjang tansah pinaringan wilujeng nir ing sambekala.

Mekaten atur kula hambok bilih wonten atur kula ingkang kirang mranani penggalih panjenengan kula nyuwun lumunturing sih samudra pangaksami.

Wasalamualaikum wr.wb.

Gambar saking: http://www.google.co.id/imgres?q=pranatacara+jawa&um=1&hl=id&client=firefox-a&sa=N&rls=org.mozilla:en-US:official&biw=1366&bih=652&tbm=isch&tbnid=Mh4Zaspc7jwOFM:&imgrefurl=http://penerbitpinus.com/produk-230-.html&docid=E96VZooCOQ00tM&imgurl=http://penerbitpinus.com/foto_produk/92PRANATA%252520CARA.jpg&w=419&h=627&ei=LKcLT_mpH4OurAfmmrWUBA&zoom=1

Karacik dening Bapa alm. Trontong Sadewa, SH.(Dosen MK Berbicara, PBSJ Unnes)

Monday, November 28, 2011

TULADHA PASRAH PENGATIN PRIYA WONTEN ING SALEBETING PAHARGYAN MIDODARENI

Mahardikeng tyas ring kamardikan nugraha miwah sih wilasanipun gusti ingkang maha agung mugi anggung sumandha wonten ing jiwangga kita sawegung waradin sagung dumadi, raharja, niskala satuhu.

Mligi tumrap para rawuh ingkang angrasuk agami islam

Assalamualaikum Wr.Wb.

Sabda minangka panggeh, tembung minangka kekenceng, inggih wacana minangka panancang.

Netepi darmaning kekadangan turta sampun sumanggem mring sesanggeman, keparenga kula marak ing ngarsa panjenengan, awit titiwanci punika kula kadhawuhan dening bapak WISNU WARDANA sekaliyan, kinen matur dhumateng bapak ABDUL NGOFUR sekaliyan.

Ingkang punika keparenga kula hamurweng gati.

Bapak WAHYU HASTANTO ingkang minangka sulih sariranipun bapak ZAENURI sekaliyan ingkang kinurmatan.

Sepisan : kepareng matur bilih sowan kula sakadang saking PEMALANG ngantos dumugi ing ngriki tansah manggih wilujeng, boten wonten pepalang menapa. Sedaya awit saking berkahing Gusti ingkang lumantar pangestu panjenengan.

Ingkang angka kalih : lumantar kulo bapak WISNU WARDANA sekaliyan ngaturaken salam taklim mugi katur dumateng bapak ZAENURI sekaliyan.

Ngancik ingkang angka tiga, inggih tritiyeng gati pisowan kulo mestuti dhawuhipun bapak WISNU WARDANA sekaliyan turta jumbuh kaliyan rancangan sowan kulo sakadang. Dalu punika sampun angganti calon pengantin priya pun HERU PRASETYA pramila tumunten kula pasrahaken dhumateng bapak WAHYU HASTANTOsekaliyan sinartan panyuwun mugi keparengan amaringi wewarah, wewuruk sangu-sanguing abalewisma

Bapak WAHYU HASTANTO ingkang kinurmatan sowan kulo sakadhang ing dalu punika ugi kinanten uba rampe saha sarat sarana ingkang sanadyan wujud sarta ajinipun boten sepintena nanging mugi sedaya saget dados sarat sarana murih raket supeketing kekadhangan ingkang antawisipun keluarga bapak ZAENURIkaliyan keluarga WISNU WARDANA ing ngriki. Sedaya kula pasrahaken dhumateng bapak WISNU WARDANA sekaliyan

Bapak ABDUL NGOFUR inkang kinurmatan kirang trep hambok bilih anggen kulo matur anggandhar-andhar angendhukur. Pramila damar mancung cinupet semanten atur kulo hambok bilih anggen kula matur kathah kirangipun keparengan hambedhah kuthaning pangapsami

Minangka panutuping atur Wassalamu’alaikum Wr. Wb.