wong jowo

Yen sira kasinungan ngelmu kang marakake akeh wong seneng, aja sira malah rumangsa pinter, jalaran menawa Gusti mundhut bali ngelmu kang marakake sira kaloka iku, sira uga banjur kaya wong sejene, malah bisa aji godhong jati aking.(Bila anda mendapat anugrah ilmu yang membuat banyak orang senang, janganlah kamu merasa pintar, sebab apabila Tuhan mengambil lagi ilmu yang menyebabkan anda terkenal itu, anda akan menjadi orang biasa lagi, malah lebih bermanfaat daun yang kering)

Showing posts with label Pidato Bahasa Jawa. Show all posts

Wednesday, August 6, 2014

Tanggap Wacana Pengetan Dinten Kartini

TANGGAP WACANA PENGETAN DINTEN KARTINI

Assalamu’alaikum wr wb

Ibu-ibu, sedherek-sedherek ingkang satuhu kinurmatan. Saderengipun, mangga kita sesarengan muju syukur ing pangarsanipun Gusti Ingkang Akarya Jagad Gusti Allah SWT, awit sih nugraha ingkang kaparingaken dhumateng kita sadaya, katitik ing siang menika, kita sadaya saged sesarengan makempal ing papan panggenan punika kanthi raharja boten kirang setunggal punapa.

Salajengipun, kula atas nami ketua penyelenggara ngaturaken agenging panuwun dhumateng para rawuh ingkang sampung nglonggaraken wekdal kersa ngrawuhi undangan ingkang sampun lumantar dhumateng panjenengan. Saged ngrawuhi pawiwahan pengetan dinten kartini.

Para rawuh ingkang kinurmatan,

Kados sampun kita sadaya mangertosi, bilih Raden Ajeng Kartini miyos ing tanggal 28 Rabiulakir taun 1806 utawi 21 April 1879 Masehi ing dhusun Mayong, Kabupaten Jepara. Raden Ajeng Kartini menika satunggaling putri saking kulawarga Bupati Jepara. Pramila ing tanggal 21 April punika kita pengeti menika dinten lahiripun Raden Ajeng Kartini. Kangge mengeti perjuanganipun Raden Ajeng Kartini ingkang sampun ngangkat drajadipun wanita Indonesia ngantos saged sami kaliyang drajading priya.

Rikala sugenging Raden Ajeng Kartini, para wanita bangsa Indonesia tansah wonten ing pingitan. Para wanita mboten dipun keparengaken sekolah. Ugi mboten dipun keparengaken gadhah padamelan ingkang sami kaliyan padamelanipun priya. Ananging sapunika, para wanita sampun sami drajadipun kaliyan para priya.

Babagan punika pranyata saestu saged dipun tingali. Sapunika sampun kathah para wanita ingkang hanglenggahi jabatan penting dados ketua-ketua utawi pemimpin-pemimpin, ngantos dados menteri utawi presiden, kados panjenenganipun Ibu Megawati Sukarnoputri ingkang jumeneng dados presiden ingkang kaping gangsal.

Para rawuh ingkang minulya,

Ing salebetipun mengeti dinten wiyosipun Raden Ajeng Kartini, ingkang kedah kita pengeti inggih punika semangatipun ing babagan emansipasi wanita. Mboten namung mengeti anggenipun kartini ngagem nyamping, anggenipun Kartini mawi sanggul ageng kemawon. Ananging kados pundit Raden Ajeng Kartini majengaken para wanita negeri kita.

Raden Ajeng Kartini menika seda tanggal 17 September 1904, antawis sekawan dinten saking anggenipun kagungan putra. Dene ingkang dados jatukramanimun Raden Ajeng Kartini inggih menika Raden Adipati Jayaadiningrat.

Mbok menawi saupami Raden Ajeng Kartini taksih gesang badhe mongkog ningali kawontenan kaum wanita ing nagarinipun. Ing sawaunipun supados setarap kaliyan priya ngenani hak-hakipun, malah sapunika kathah ingkang dipun ginaaken tumuju dhumateng kawontenan ingkang mboten ngremenaken. Kadosta para wanita ingkang kathah sami ses rok, para wanita kathah ingkang mawi clana. Punika mboten ateges emansipasi! Raden Ajeng Kartini mboteng nggadhahi emansipasi ingkang kados mekaten!

Emansipasi ingkang dipun perjuangaken Raden Ajeng Kartini inggih punika ngengingi hak ingkang sami antawisiupun priya kaliyan wanita. Menawi priya dipun parengaken ngudi ilmu wonten ing pawiyatan luhur, para wanita inggih dipun parengaken ngudi ilmu wonten ing pawiyatan luhur. Mboten namung wanita dipun parengaken wonten ing wingking supados masak kemawon.

Saderengipun wonten emansipasi saking Raden Ajeng Kartini, wanita nyambut damelipun namung wonten pawon, mboten wonten kaum wanita ingkang nyambut damel wonten ing kantor-kantor kados sapunika. Awit sampun wonten paribasan, menawi kados pundi inggilingipun sekolah, wanita ing tembenipun bakal nyambut damel ing pawon.

Ibu-ibu dalah remaja putri ingkang satuhu kinurmatan.

Mbok bilih sapunika para wanita sampun sami nyambut damel kangge majengaken bangsa, nagari, tuwin agami, ananging mboten kentun menawi tansah kaum wanita ingkang sami ngula wenthah amrih raharjaning keluwarga ugi tumut majengaken generasi muda supados mbina rumah tangganipun saksae-saenipun.

Kula kinten kirang wicaksana menawi atur wacana menika kula panjang lebaraken. Pramila kula cekapi semanten kemawon. Mboten kantun kula ngaturaken agung ing panuwun dhumateng para rawuh ingkang sampun sami anyengkuyung wontenipun pengetan punika kanthi bantuan ingkang arupi menapa kemawon. Mugi sadaya wau pikantuka ingkang samurwat saking ngarsanipun Gusti Ingkang Maha Asih, Gusti Allah SWT.

Wassalamu’alaikum wr wb

Matur nuwun

Tuesday, March 25, 2014

Pambuka - Panutup (Pidato Bahasa Jawa)

Pambuka (Miwiti Acara):

Para rawuh kakung putri wredha mudha minulya.

Samangke sampun tabuh …. WNIK.

Nitik sasmita ingkang sampun kula tampi, sedaya sampun rumanti sarta miranti.
Ingkang menika nyuwun idi saha pangestu panjenengan, pahargyan ing sonten menika badhe kawiwitan.

Minangka purwaka utawi pambuka, sumangga panjenengan sedaya kula dherekaken manungku puja brata, sumujud ing sahandhap pepadanipun Gusti Ingkang Akarya Jagad. Anut pandam pandom agami saha gegebenganipun sowang-sowang.

Esthining manah, mugi pahargyan ing sonten menika saged katindakaken kanthi gancar, lancar, sepi ing sambekala.

Namung, mligi katur para rawuh ingkang ngrasuk agami Islam, sumangga panjenengan sedaya kula dherekaken maos basmallah sesarengan.

Panutup (mungkasi acara):

Para rawuh kakung putri wredha mudha minulya.

Setunggal mbaka setunggal lampahing tatacara pahargyan ing dalu menika sampun saged katindakaken kanthi raharja. Wahyaning mangsakala wus ndungkap titi purnaning pahargyan. Mangke ingkang badhe kondur ngaturaken sugeng kondur, ingkang badhe nglajengaken wungon ngaturaken sugeng wungon.

Wonten ing sungapaning pahargyan, kula pun Chafid Ibnu Abdillah, ingkang piniji pinitaya minangka panatacara hambok bilih anggen kula ngayahi jejibahan wonten galap gangsuling atur, kithaling basa, kiranging subasita myang tatakrami kula nyuwun lumunturing sih samodra gung pangaksami.

Kalau ada jarum yang patah jangan simpan di dalam peti,
kalau ada tutur kata saya yang salah jangan simpan di dalam hati.

Sugeng dalu, sugeng kondur. Minangka panutuping atur

Wassalamu’alaikum Warohmatullahi Wabarokatuh.

Nuwun.

ditulis di Takmir Fip Unnes, 21 Juni 2009; 19:33 wnik. Chafid ibnu abdillah PBSJ Unnes.

Tuesday, January 10, 2012

Tuladha Panatacara Pambagyaharja

Mahardikeng tyas ring kamardikan, nugraha miwah sih wilasanippun gusti ingkang maha agung, mugi anggung sumandha wonten ing jiwangga kita sawegung waradin sagung dumadi raharja niskala satuhu.

Mligi katur para rawuh ingkang hangrasuk agami islam assalamualaikum wr wb.

Para sesepuh myang pinisepuh ingkang pantes sinungkeman, para sanak kadang sentana warga pawong mitra ingkang tansah sinambrama ing pamboja, para rumaja putra rumaja putri ingkang tansah kinasih ing gusti, waradinipun dhumateng sangyaning para rawuh kakung putri wreda mudha minulya.

Minangka purwakaning atur, keparenga kula ngaturaken pambagya wilujeng, saha ngaturaken gunging panuwuningkang tanpa pepindhan tumrap karawuhan panjenengan sedaya.

Ing salajengipun, mugi kepareng kula angambali atur uninga, bilih wontenipun pajenengan sedaya karawuhaken wonten ing wismanipun Bapak ………..( pamangkugati / yang punya hajat ) ing ri kalenggahan punika, wigatos kasuwun pangestu saha kasuwun anjenengi anggenipun amiwaha putri warujunipun (putri ingkang angka tiga) ingkang asesilih ……….( nama pengantin putri) pikantuk putra panenggakipun Bapak ………..( ayah pengantin putra ) sekaliyan saking …………( almt asal pengantin putra ) ingkang akekasih ………….( nama pengantin putra )

Lumantar kanthi puja-puji panjenengan sedaya kasebat, mugi-mugi gusti ingkang maha tunggal aparing nugraha agung dhumateng pengantin kekalih minggahipun ingkang sami mangun bebesanan. Mugi saged ambabar karahayon. Guyub rukun rerentengan reruntungan anggenipun sami mangun bebrayan/balewisma enggal widodo nir ing sambekala. Kadumugen ingkang sinedya, ing satemah mahanani bagya mulya yuwana air batos, ing donya prapteng dlahan.

Boten kasupen Bapak …………(pamangku gati ) ngaturaken angunging panuwun ingkang tanpa pepindhan tumrap paringipun dana ingkang maneka warni, ingkang boten saged kaaturaken satunggal baka satunggal. Pamangku gati sekaliyan boten saged caos tetimbangan punapa-punapa. Kejawi among tansah nyenyuwun dhumateng gusti ingkang murbeng titah. Mugi kepareng anglunturaken sih nugraha dumateng panjenengan sedaya, satraju kaliyan sih kadarman panjenengan.

Ing wasana damar mancung cinupet semanten atur kula hambok bilih wonten muna muni tandhang graying kitaling subosita kula titah sak wantah nyuwun agunging samudra pangapsami.

(Kapundhut saking tuladha medhar sabda panatacara mata kuliah berbicara asuhan Rama alm. Trontong Sadewa Unnes Semarang 2007)