wong jowo

Yen sira kasinungan ngelmu kang marakake akeh wong seneng, aja sira malah rumangsa pinter, jalaran menawa Gusti mundhut bali ngelmu kang marakake sira kaloka iku, sira uga banjur kaya wong sejene, malah bisa aji godhong jati aking.(Bila anda mendapat anugrah ilmu yang membuat banyak orang senang, janganlah kamu merasa pintar, sebab apabila Tuhan mengambil lagi ilmu yang menyebabkan anda terkenal itu, anda akan menjadi orang biasa lagi, malah lebih bermanfaat daun yang kering)

Showing posts with label 01 GUYON SEKOLAHAN. Show all posts

Tuesday, January 10, 2012

OH, TRESNAKU PEDHOT NENG TENGAH DALAN …

Pancene wong tresna iku ora mawang umur, tuwa enom, lanang wadon padha wae. Umur pira wae bisa ketaman sing jenenge tresna. Apa maneh sing ditonton saben dina mung TV sing nyiarake cinta-cintaan. Njur sing nonton kelu, rumangsa kaya-kaya sing digambarake neng TV mau. Sing rada ngrepotake wong tuwa yaiku nalika sing ketaman tresna iki durung cukup umur.
Sing arep dakcritakake iki sawijining prastawa sing kedadean ing sawijining sekolahan ing Surabaya. Ana sawijining murid wadon SMP kelas siji (pitu), dak cekak wae jenenge Cipluk (jeneng singlon) dumadakan semaput ana ing jero kamar WC, Bocah mau banjur dibopong digawa menyang ruang UKS. , Sawise eling banjur ditakoni,
“Kowe mau wis sarapan?” pitakone bu guru marang Cipluk.
“Sampun, bu” wangsulane.
“Njur, kena apa kowe kok semaput?”
Bocah mau mung meneng wae. Dumadakan kancane kenthel Cipluk kandha yen dheweke bubar nampa layang saka pacare. Jarene sesambungane Cipluk lan pacare dipedhot.
“Lho, kowe wis duwe pacar, ta?” bu guru kaget.
Cipluk ditakoni mung meneng wae. Kancane sing mangsuli, “Sampun, bu. Lha niki seratipun.” Bu guru banjur nampani layang banjur diwaca. Sawise diwaca banjur disimpen neng jero laci. Ora suwe bu guru ndangu maneh.
“Sapa pacarmu?” Cipluk ora gelem mangsuli.
“Lare kelas pitu A, bu” wangsulane .
“Undangen mrene,” bu guru banjur ngutus bocah liyane nimbali Arman (jeneng singlon) pacare Cipluk . Bareng wis teka banjur didangu,” Man, bener kowe pacare Cipluk ?”
“Boten , bu ….. boten, bu,” Arman selak.
“Lha iki layange sapa ?”
Arman ora bisa selak maneh, mung cengingas- cengingis.
“Aja cengingas-cengingis kowe. Yen ngene ki piye. Nganti semaput neng WC, njur yen ora konangan piye. Kowe tanggung jawab ?” bu guru akeh-akeh ndukani Arman. Bu guru njur mbacutake ngendikane, “Kowe kabeh ki isih piyik, isih cilik. Saiki wis ora usah layang-layangan barang. Ulangan ora tau entuk biji enem, layang-layangan digedhekke.”
Pancene bocah saiki isih cilik wis pinter pacaran, apa maneh saben dina sing diguroni TV. Bareng para bapak ibu guru krungu larah-larahe Cipluk semaput, ana sing cluluk ,”Gurune wae umur patang puluh enem durung ngrasakake pacaran, malah muride dha nganti semaput barang.”

OH, TRESNAKU PEDHOT NENG TENGAH DALAN …

Monday, June 21, 2010

RSBI, RENCANA SEKOLAH BESAR IURAN

RSBI saiki lagi digandrungi wong sa Indonesia. Wiwit saka Sabang nganti teka Merauke pada kepingin nyekolahake anake menyang RSBI. Daya pangaribawane tembung "internasional" pancen ngedab-edabi banget. Apa ta sing diarani standar internasional? Krungu-krungu gurune yen mulang nganggo basa Inggris. Pancene saiki yen ora nganggo cap internasional ora payu, kurang gagah. Mula sekolahan-sekolahan uga mbudidaya kanthi cara apa wae supaya sekolahane klebu golongan internasional mau. Apa akibate ?
Siji, gurune dipeksa sinau maneh. Pancen wis wajibe guru-guru kudu tansah nambah ngelmu. Ana sing les basa Inggris, ana sing sekolah S2 lan uga ana sing sekolah S3 barang. Sing lulusan PGSLP minggir, jalaran pancene wis wayahe pensiun. Guru-guru yen mulang kudu nganggo basa Inggris, paling ora dwi bahasa utawa bilingual yaiku : Basa Inggris, Matematika, IPA.
Kanggone guru, kudu bisa mulang nganggo basa Ingris, mula sadurunge ngomong mikir dhisik basa Inggrise piye. Contone guru kandha :
1.
Basa Jawa : Ngapa kowe bola-bali metu ?
Basa Indonesia : Mengapa kamu kembola-kembali keluar ?
Basa Inggris : Why you back-beck go out ?

2.
Basa Jawa : Indah mlaku-mlaku ana ing mall.
Basa Indonesia : Indah berjalan-jalan di mall.
Basa Inggris : Indah walking-walking in the mall.

3.
Basa Jawa : Lha iya. Aku mau ngomong apa ?
Basa Indonesia : Lha iya. Saya tadi bilang apa ?
Basa Inggris : Lha iyes. I was said what ?

Iku lagi perkara basa. Gurune bingung golek tembung , muride ya bingung anggone nampa. Ngerti-ora ngerti dianggep ngerti. Yen ora ngerti nganggo basa Tarzan. Durung perkara liya-liyane.
Negara sing kena kanggo conto : Malayasia. Malaysia saiki nyuwak basa Inggris dianggo wulangan-wulangan ing sekolahan. Jalaran bijine wulangan sing nganggo basa Inggris mudhun.
Kanggone murid, mikir isine wulangan wae wis kangelan. Isih ditambahi basane guru sing ora cetha. Dadi kangelan pindho.
Jalaran internasional wragade uga internasional. Ana sing kandha yen sumbangan saka wong tuwa wali murid ora mung atusan ewu repis, nanging yutan. Malah-malah ana sing kandha nganti puluhan yuta. Lumrahe sing bisa mlebu menyang sekolah RSBI anake wong sugih-sugih, nanging iku lagi tembung jarene. Mula tembung RSBI banjur diplesetake Rencana Sekolah Besar Iuran.
Ana maneh tembung plesetan sing rada nggatelake ati yaiku : guru lan kepala sekolah RSBI itu tegas-tegas, tegel tur .......

RSBI, RENCANA SEKOLAH BESAR IURAN

Saturday, May 15, 2010

BU GURU LALI

Sing arep dakcritakake kedadean neng kutha Surabaya. Masalah kampunge utawa desane ora susah dak terangake, sing cetha Surabaya.
Ana sawijining bu guru dak tulis wae bu Ani (jeneng singlon) mulang ana ing Sekolah Dasar. Bu Ani nalika semana ngelesi (les privat) bocah kelas loro ana ing sekolahan. Bubar mulang sing samesthine banjur wiwit mulang les bocah-bocah . Miturut ngendikane bu Ani les privat mau suwene rong jam. Les diwiwiti jam setengah siji.
Sawise bocah-bocah les padha mlebu kelas, banjur diparingi soal, dikongkon nggarap muride. Bocah-bocah anggone nggarap ya temenan. Ora ana sing gojegan, ora ana sing rame. Pancene wis didhawuhi ora pareng rame. Dhasare muride ya pinter-pinter lan tansah ngestokake dhawuhe guru, mula kelase mau ya ora rame lan sing penting ora ana sing tukaran.
Kocapa bareng kira-kira wayahe mulih, kira-kira wis jam setengah telu. Wong tuwa sing padha methuk, sing biasane lungguhan ana ing ngarep sekolahan goreh atine , wiwit padha takon. Wis jam setengah telu kok durung diulihake?
Banjur ana salah sijine wali murid sing kepingin weruh, mlebu sekolahan. Bareng dideleng , lho gurune kok ora ana ? Wali mjurid mau nggoleki ngubengi sekolahan, di goleki mrana-mrene ora ketemu. Wali murid banjur takon menyang bocah-bocah sing padha les: “ Ke mana bu Guru ?”.
Wangsulane bocah-bocah: “ Nggak tahu, tadi keluar”.
Wali murid mau nggoleki maneh ngubengi sekolahan, ketemu pak kebon sekolahan sing lagi turu neng dhuwur bangku, banjur diatkoni. Wangsulane iya ora ngertine. Pak kebon ora mulih ya merga nunggu bocah-bocah nganti rampung lese.
Pak Kebon bareng ditakoni wali murid ya bingung banjur nelpon salah sawijining pak guru.sing mulang ana kono. Guru iki mau ya wis kondur wiwt jam siji mau, malah kondure paling keri dhewe. Rumangsa tanggung jawab pak guru mau banjur mara menyang sekolahan.
“Dhateng pundi bu Ani, ;pak ?” pitakone pak kebon bareng pak guru teka ing sekolahan.
“Aku ya ora ngerti. Aku mau rak mulih keri dhewe. Lha saiki apa bocah-bocahe apa durung diulihake?”
“Dereng.”
“Coba dak tilpune. ,” ngendikani pak Guru. Bareng ditilpun HP ne ora diangkat. Tilpun nganggo nomer omah uga ora diangkat. Batine, menyang ngendi wae bu Ani iki ? Pak Guru uga melu bingung.
Ngerti kaya mangkono pak guru banjur ngendika karo wali murid, : “Sudah pak sekarang dipulangkan saja. Sekarang sudah hampir jam empat.”
Bocah-bocah padha didhawuhi mulih. Wali murid akeh sing nggremeng. Pak guru banjur ngutus pak bon ,”Saiki njajal golekana menyang daleme !”
Temenan pak bon banjur mara menyang daleme bu Ani. Saka kadohan bu Ani wis leyeh-leyeh ana ngarepan karo nyomak-nyamuk sajak mentas dhahar.
“Bu Ani , panjenengan wau ngelesi napa mboten ?” pitakone pak bon.
“O, iya. Aku lali !,” wangsulane bu Ani gragapan.

Komentar sampeyan piye ca ? Dak tunggu !

Ket: gambare nyilih.

BU GURU LALI

Saturday, April 10, 2010

SIRAHMU MBLEDHOS

Sawijining dina aku mlebu kelas wolu. Sawise aku nerangake wulangan sing wulangake. Aku banjur takon marang bocah-bocah.
“Wis ngerti ….. ?”, pitakonku marang bocah-bocah.
Kaya biasane bocah-bocah mangsuli bareng ,”Tiiiiiiii……”,
Aku takon maneh,”Sapa sing durung ngerti ?.”
Bocah-bocah siji wae ora ana sing ngacung.Tegese wis paham sing dak wulangake.
Aku banjur kandha,” Ya wis, yen ora ana sing ngacung tegese wis ngerti kabeh. Saiki sing dak takoni maju !”.
Bocah-bocah wis wiwit padha usreg.
“Kowe, Mardi (jeneng singlon, nama samaran) majua !”pakonku marang Mardi.
Mardi banjur maju menyang ngarep, banjur daktakoni.
“Apa jenenge alat sing kanggo ndeleng barang sing cilik banget ?”
“Mikroskop, pak “, wangsulane mantep.
“Ya bener. Lha yen alat kanggo ngukur suhu ?”
“Thermometer”, wangsulane.
“Pinter,” wangsulanku. “Suhu iku tegese apa ?”
Mardi katon thingak-thinguk ora ngerti. Mripate nyawang kanca-kancane, mbok menawa ana sing ngerti. Katon ana bocah siji mbisiki saka mburi.
Aku banjur mbengok “Meneng, sapa sing ngandhani tak kongkon menyang ngarep. Yen ora bisa mengko dak kongkon ngubengi lapangan ping telu.”
Bocah-bocah meneng cep klakep, ora ana sing cemuwit.
“Suhu badan orang sehat pira, Di ?”, pitakonku.
“Seratus, pak”.
“Satus apa ?
“Seratus derajat Celsius”
Aku banjur nesu, banjur takon,”Sapa gurumu biologi ?”
“Bu Ita (jeneng singlon)”, wangsulane bocah-bocah bareng.
Mardi banjur metu klunuh-klunuh, nggoleki bu Ita. Bu Ita iku guru Biologi sing kondhang kereng.
Ora antara suwe Mardi mlebu kelas maneh.
“Bu Ita ndhak ada, pak , “kandhane Mardi sadurunge daktakoni.
“Ana. Aku mau esuk ketemu .Ggolekana maneh !,” pakonku.
“Ndhak ada, pak. “ Mardi ngengkel.
Aku banjur ngongkon bocah loro, siji dak kongkon nggoleki guru Kimia, sing sijine dak kongkon nggoleki guru Fisika. Bocah mau dokkongkon takon “suhu badan orang sehat”.
Ora suwe bocah mau banjur mlebu kelas maneh.
“Kuwi njajal. Kandhanana Mardi "
“37 atau 36 derajat, pak.”
“Ya. Kelas loro SMP kok ora ngerti suhu badan orang sehat. Iki ngono pelajaran SD ,” omelku.”Yen satus derajat, sirahmu mbledhos, ngerti ”
Bocah-bocah ngguyu geeer.

SIRAHMU MBLEDHOS

Friday, March 5, 2010

JANGKAR

Sing arep dakcritakake iki pengalamane kancaku guru matematika. Sawijining dina pak guru mau ndhawuhi muride supaya nggawa jangka. Bareng tekane dina candhake ing kelas iku pak guru mlebu kelas, dhawuh supaya bukune ditokake.
"Ayo, bukumu ndang tokna !", mangkono pangandikane pak guru karo mubeng nliti sapa sing nggawa buku lan sapa sing ora.
Bareng teka ngarepe salah sawijine bocah, bocah mau kandha, "Maaf, pak. Saya tidak membawa jangkar".
Pak guru mau kaget, banjur ngendika,"Lho, kowe nggawa jangkar arep koanggo apa. Apa kowe dadi nakodha kapal kok nggawa jangkar ?"
Bocah mau mangsuli,"Itu lho pak yang dipakai membuat lingkaran."
"Oooo, iku ta. Iku jenenge jangka dudu jangkar".
Pak guru banjur ngelus dhadha ing ngatase kelas IX SMP kok ora bisa mbedakake antarane jangkar karo jangka.
Piye ca, murid sampeyan apa ya kaya ngono? Aku nyuwun komentar panjenengan.

JANGKAR

Thursday, August 20, 2009

Jelaaaas .......... blas.

Sawijing dina aku mlebu kelas. Nerangake wulangan anyar. Sawise ngomong ngalor ngidul nganti kesel aku banjur takon:"Wis ngerti ?"
Wangsulane muridku bareng : "Tiiii ......."
Krungu wangsulane muridku sing kaya mangkono atiku seneng banget. Ora muspra anggonku mulang.Ya ngene iki senenge guru, yen wulangan sing diwulangake marang murid dingerteni kabeh.
Aku banjur takon maneh, "Jelaas ???"
Wangsulane muridku ya bareng,"Llaaaaaaaas !!!"
Aku ora kepenak atiku banjur takon, " Jelas apa blas ?"
Muridku ora ana sing mangsuli. Kabeh padha meneng.
Aku banjur kandha :"Kowe iki yen matur sing temenan, aja ngapusi. Yen ngerti ya kandhaa ngerti, lan yen ora ngerti ya kandhaa yen ora ngerti. Aja ora ngerti banjur kandha ngerti.Jelaaas !."
Bocah-bocah padha mangsuli bareng:"Laaaaaas!!"
Ana bocah sing lungguh mburi, ketoke rada ngempet guyu, lambene ditutupi tangan. Nanging aku isih krungu yen ana sing cekikikan. Aku banjur prentah supaya bocah mau maju menyang ngarep kelas.
Dheweke banjur tak kongkon nggarap ing blabag. Ketoke ora bisa. Aku banjur nesu:"Kowe iki ngerti ora ?"
Muridku banjur mangsuli:" Saya tadi kan bilang blas, pak!"
"Ooooooo, pancene", grenengku.

Jelaaaas .......... blas.

Wednesday, July 1, 2009

Diwulang Tas

Ing sawijining dina Kepala Sekolahku lagi tindak-tindak ngubengi sekolahan. Dina iku rada gumun jalaran bocah-bocah iku biasane rame kok meneng wae. Bareng diinguk ing sajeroning kelas pranyata ora ana gurune, sing ana mung tas ing saduwure meja. Bocah-bocah ya mempeng angone nggarap.
Bapak Kepala sekolah banjur takon marang bocah-bocah : "Siapa jam ini yang mangajar?"
Bocah-bocah mangsuli bareng :" Bu Sudarti (jeneng samaran ca)".
Kepala Sekolah ya ora ngendikan apa-apa mung ngendikan :"Ooo, ya ", banjur nerusake tindake.
Bareng rapat dewan guru, bapak Kepala Sekolah nyemoni :"Anak-anak sekarang pinter-pinter. Diajar oleh tas, manut-manut saja. Mereka mengerjakan dengan tekun. Hal itu mungkin lebih tekun, lebih baik, kalau diajar oleh guru. Siapa bilang ada murid bodoh?"
Mangkono ngendikane kepala sekolah. Sing kena semprot ya mung meneng wae.
Piye ca sampeyan ?

Diwulang Tas

Tuesday, June 9, 2009

Jujur Kacang Ijo

Saiki lagi rame-ramene kabar UNAS. Akeh bocah SMA sing ora lulus jalaran curang, ora jujur. Kabar saka SMA Ngawi, Mediun, Gorontalo, Bangka Belitung,Sulawesi Kulon, Sulawesi Kidul, Sulawesi Kidul Wetan, lan Jawa Kulon. Kabare sa sekolahan ora lulus . Malah-malah murid SMP sa Kabupaten Konawe ora lulus (JP, 2/6/2009) Kok bisa ?. Kabare, guru, pulisi, nganti pejabat percetakan katut. Kabar kang nyedhihake ing jagading pendidikan. Sekolah sing kanggo "mencetak" kader-kader bangsa lan pemimpin masa depan ana lan akeh sing ora jujur. Apa sebabe ? Masalahe ora sederhana, ora gampang. Salah sijine yaiku guru ora mentala yen nganti muride ana sing ora lulus. Guru uga kuwatir yen ana muride sing ora lulus, banjur taun ngarep ora oleh murid, mula ora aneh yen pak guru lan bu guru banjur golek reka daya supaya muride bisa lulus satus persen. Tahun kepungkur ana kepala sekolah sing kepeksa ditangkep pulisi jalaran mbukak amplop soal sing mesthine lagi bisa dibukak ing sangarepe bocah-bocah sing ujian.
Satemene kabar kaya mangkono (kecurangan) iku ora mung taun iki. Taun-taun sadurunge wis ana. Kaya upamane kelompok "Air Mata Guru" saka Medan wis elik-elik yen pelaksanaan ujian ora jujur. Pelaksanaan ujian dhewe satemene wis dirancang supaya kebocoran-kebocoran iku bisa disumpet.
Kabar iki banjur dakcritakake marang muridku. "Kamu harus belajar lebih keras lagi, kalau kamu ingin lulus. Yang kedua, kamu harus jujur. Lebih baik mendapat nilai rendah tetapi usaha sendiri, daripada mendapat nilai tinggi tetapi nyontek pekerjaan orang lain. Jujur terhadap dirimu sendiri maupun kepada orang lain"
Ora nyana, ana salah sijine murid sing nylemong :"Jujur kacang ijo, pak".
Aku mangsuli karo atiku mangkel:"Kacang ijone mbahmu kuwi !!"

Jujur Kacang Ijo

Saturday, May 16, 2009

S Pd, Sarjana Pekok Dhewe

Aku duwe kanca, sing mulang ana sawijining SMP ing daerah Pacitan. Kanca mau weton PGSLP (Pendidikan Guru Sekolah Lanjutan Pertama). Sawise diangkat dadi guru dheweke ora gelem nerusake sekolah kaya kanca-kanca liyane. Alesane arep kanggo apa? Wong saiki wis omah-omah ribet ngurusi omah, ribet ngurusi anak. Saiki wae nyelengi sing akeh kanggo beaya kanggo bocah-bocah mbesuk, kareben bocah-bocah wae mbesuk bisaa sekolah sing dhuwur, mangkono alesane.
Kira-kira tahun saduringe tahun 2000, ana ketentuan saka Diknas yen guru-guru kudu nduweni ijazah S1. Dheweke ya tetep ora keguh. Wong wis tuwa arep apa? Pangkat ya sapangkat-pangkate wong neng desa wae. Bareng saiki dheweke bingung, jalaran pemerintah majibake guru, yen tetep kepingin dadi guru kudu lulus sertifikasi, nduwe sertifikat kanggo mulang, lamun ora duwe sertifikat ora kena mulang. Kanca mau tetep panggah ora gelem sekolah maneh, alesane ora oleh mulang ya ora apa-apa, nyambut gawe wae ana ing kantor.
Nalika pak Bambang Sudibya dhawuh yen bakal ana tunjangan khusus kanggo guru, nanging nganggo syarat kudu lulus sertifikasi, dheweke isih duwe alesan, paling-paling nganggo dhuwit "YEN" . Dudu dhuwit "yen" saka negara Jepang , nanging "yen ana". Bareng saiki kanca-kanca wis padha lulus S1 padha nganggo gelar SPd, lan ya wis akeh sing nampa tunjangan mau, dheweke kandha :" Lha apa sampeyan thok sing duwe gelar S Pd, aku rak ya duwe".
Pitakone kancane :" Sampeyan iku S Pd apa?" .
"Ora ngandel, aku rak S Pd = Sarjana Pekok Dhewe (Sarjana sing paling goblog)".
Piye ca yen ngene iki ???

S Pd, Sarjana Pekok Dhewe

Saturday, March 7, 2009

Aja ngrokok, yen durung sakti !

Sawijining dina aku mulang bab bebayane ngrokok. Apa sebabe rokok kok dilarang, jalaran ing rokok ngandhut racun-racun sing bisa ndadekake awak ora sehat. Wis mesthi bae para maos wis ngerti kabeh. Aku dhewe ing jero kelas ya ora nate ngrokok. Yen kepingin ngrokok ana ing jabane kelas. Kabeh dak terangake kanthi gamblang. Sejene rokok ngandhut racun, roko uga ngentekake dhuwit blanja. Yen dietung ing dalem setaun bisa nganti yutan rupiyah. Gampangane : sedina ngrokok entek rong bungkus, regane 2 ping Rp. 7.500 ana limalas ewu rupiyah. Sesasi kari ngepingake wae, limalas ewu rupiyah ping 30 kira-kira ana patangatus ewu rupiyah. Yen setaun wis pira ? Lha rak meh limang yuta !
Bali anggonku mulang mau, sajake bocah-bocah wis padha ngerti. Aku banjur takon, "Anak-anak sudah paham atau belum?". Muridku mangsuli , "Sudaaaaaah !".Aku banjur takon maneh, "Siapa yang ingin bertanya, silakan!"
Ana muridku sing takon, "Pak Guru saya lihat kok masih ngrokok". Aku mangsuli, "Saya kan sakti, oleh sebab itu kalau kamu nggak sakti, jangan ngrokok! Satemene wangsulanku mung sakecandhake. Sepurane sing dawa ca !

wong jowo

Tuesday, January 10, 2012

OH, TRESNAKU PEDHOT NENG TENGAH DALAN …

OH, TRESNAKU PEDHOT NENG TENGAH DALAN …

Monday, June 21, 2010

RSBI, RENCANA SEKOLAH BESAR IURAN

RSBI, RENCANA SEKOLAH BESAR IURAN

Saturday, May 15, 2010

BU GURU LALI

BU GURU LALI

Saturday, April 10, 2010

SIRAHMU MBLEDHOS

SIRAHMU MBLEDHOS

Friday, March 5, 2010

JANGKAR

JANGKAR

Thursday, August 20, 2009

Jelaaaas .......... blas.

Jelaaaas .......... blas.

Wednesday, July 1, 2009

Diwulang Tas

Diwulang Tas

Tuesday, June 9, 2009

Jujur Kacang Ijo

Jujur Kacang Ijo

Saturday, May 16, 2009

S Pd, Sarjana Pekok Dhewe

S Pd, Sarjana Pekok Dhewe

Saturday, March 7, 2009

Aja ngrokok, yen durung sakti !

Aja ngrokok, yen durung sakti !

Flickr Images

Like us on Facebook