wong jowo

Yen sira kasinungan ngelmu kang marakake akeh wong seneng, aja sira malah rumangsa pinter, jalaran menawa Gusti mundhut bali ngelmu kang marakake sira kaloka iku, sira uga banjur kaya wong sejene, malah bisa aji godhong jati aking.(Bila anda mendapat anugrah ilmu yang membuat banyak orang senang, janganlah kamu merasa pintar, sebab apabila Tuhan mengambil lagi ilmu yang menyebabkan anda terkenal itu, anda akan menjadi orang biasa lagi, malah lebih bermanfaat daun yang kering)

Showing posts with label Sesorah. Show all posts

Monday, December 31, 2018

Sanggan, Paningset Saha Lambang Kalpika

Rehning lamaran sampun katampi saha pancasan inggih sampun golong gilig ateges karekat bebesanan sampun dados. Ing wekdal ingkang sae lajeng dipun adani upacara pasrah sanggan paningsetan.
Adicara pasrah sanggan punika nggadhahi ancas paring paningset saking kulawarga kakung dhumateng kulawarga putri. Cathetabipun putra kakung ningseti putri calon jatukramanipun. Ing papan sanes wonten ingkang mastani tukon.
Pasrah sanggan saha lambang kalpika punika minangka satunggaling cara utawi sarana paningsetan. Adicara pasrah sanggan lan lambang kalpika punika saged dipuntindakaken piyambak – piyambak utawi kagarba dados satunggal. Dene tumindakipun saged mirunggan, saged ugi kanthi prasaja.

Ubarampenipun adicara pasrah sanggan saha lambang kalpika :

1. Kalpika ingkang kawadhahan ing kandhaga alit
Limrahipun wujud pethi utawi kreta alit ingkang sinepuh perak utawi kemasan. Kalpika utawi seser wujudipun ali – ali bunder gilig boten sigar penjalin ingkang mawi pedhotan. Maknanipun tresnanipun ingkang badhe gesang tembayatan boten wonten telasipun, saking awal dumugi akhiripun , saking donya dumugi delahan.

2. Ageman putri sapengadek : kebayak, nyamping, kotang, kendhit utawi angkin, lan sapanunggalanipun.
Maknanipun : putra kakung badhe nyekapi sedaya kabetahaning garwa, nutupi sedaya wewados utawi saru sikuning garwa, ngemuli lair lan batosipun, temah garwa boten kawudan utawi boten kacingkrangan.

3. Rerenggan pelik – pelik : gelang, kalung, suweng, lan sapanunggalanipun
Maknanipun : Putra kakung tansah badhe ngudi dumoroting garwa, boten badhe tumindak ingkang saged ndadosaken kuceming garwa, satemah saged tepa palupining brayat.

4. Jadah, wajik, jenang lan sapanunggalanipun.
Maknanipun : Wos ketan menawi taksih wujud las – lasan taksih kemepyur, nanging menawi sampun kaolah dados jadah, wajik, lan sapanunggalaipun luluh dados satunggal, loro – loroning atunggal. Nadyan wujud jalu wanita saged saeka kapti ing pakarti, saeka praya ing sedya. Lapis warni abrit lan pethak punika minangka pralambang manunggaling rah lan sum – suming kakung putri. Rah saha sumsum punika boten saged kapisahaken. Pisah kekalihipun ateges sirna. Kados sedyanipun risang calon penganten ingkang pepacangan, boten wonten ingkang kuwawi misahaken kekalihipun kajawi oncating nyawa saking raga.

5. Woh – wohan : jeram, manggis, nanas, salak, lan sapanunggalanipun.
Maknaipun : Mugi tresnanipun kakung putri punika saged mujudaken woh ingkang sejati tumuju ing ancas ingkang sinedya nuninggih palakrama.

6. Suruh ayu lan gedhang ayu.
Maknaipun : Suruh pindha lumah lan kurepe, nadyan beda rupane nanging tunggal rasane. Sanadyan mijil tanapi wanita, menawi sampun manunggal ing rasa cipta, rasa miwah karsanipun, keklihipun badhe saged saeka praya ing sedya, saeka kapti ing pakarti. Sedaya wau namung awit saking tempuking rasa tresna lan asih. Pisang limrahipun pisang raja, amrih kakung putri tumindakipun pinindha raja ingkang sarwa – sarwi tanggel jawab.

7. Cengkir gadhing ( saged kagambar pepethan wayang Kumajaya – Ratih, Janaka – Sambadra).
Maknanipun : cengir punika isi toya ingkang suci mugi tresnanipun jalwestri wau linambaran tresna ingkang suci kados paraga wayang kasebut.

8. Arta utawi Buwuh
Maknanipun : Buwuh punika menawi dipun kerata dados imbuh imbuh anggenipun badhe ewuh. Tiyang mantu punika panci badhe kagungan damel utawi ewuh.

9. Urip – urip : ayam (lancur lan dhara) utawi kambangan utawi Banyak sajodho.
Maknanipun : Ingkang badhe jejodhohan sageda tanggel jawab dhumateng baryatipun kados dene urip – urip mau.

Awit saking kemajengan jaman, ubarampe kasebut saged kapesen utawi tumbas dados. Lumrahipun ubarampe pinetha peksi, ayam, utawi banyak ingkang winadhahan baki. Ubarampe katambah roti – roti, utawi nyamikan sanesipun.

Sumber: Blog Kangsura

Pidhato

v Tegesipun Pidhato

Pidhato utawa ana sing nyebut sesorah tegese micara ing sangarepe wong akeh utawa umum, ana uga kang ngandharake yen pidato utawa sesorah yaiku medharake gagasan utawa panemu kanathi migunakake basa lisan ing ngarepe wong utawa pamireng akeh.

Kegiyatan micara ing samgarepe wong akeh bisa kabagi dadi loro, yaiku :

a. Wong kang pidhato nalika rampung anggone menehi sesuluh marang pamiarsane,

lan ora menehi kalodhangan kanggo takon utawa menehi tanggepan.

Tuladhane kayata ceramah, wara-wara, lan khotbah.

Wong kang pidhato nalika rampung banjur menehi wektu marang pamiarsa kanggo menehi tanggepan.

Tuladhane kayata diskusi lan rapat.

Kagiyatan pidhato diwiwiti kanthi nemtokake urutan-urutan kaya ing ngisor iki.

a. Naliti prakara kanthi

1) Nemtokake arahan utawa tujuan pidhato kang bakal digayuh.

2) Naliti pamiarsa kayata lanang kabeh utawa wedhok kabeh, umure rata-rata

Piro, lsp.

3) Naliti kahanan kayata wayah esuk, awan utawa bengi, bisa uga lagi mangsa

Apa.

4) Milih lan mbatesi topic.

b. Nata pidhato kanthi

1) Nglumpukake bahan.

2) Nata utawa nggawe cengkorongan (rangkane pidhato).

3) Ngandarake kanthi cetha.

c. Gladhen kanthi migatekake

1) Intonasi utawa lagu swara

2) Sikap

3) Gaya basa

4) Wirama

Anggone pidhato bisa tumindak kanthi rancag lan apik, perlu dianakake kagiyatan

Pambuka, yaiku :

a. Nata pokok-pokok pikiran

b. Ngripta pokok-pokok pikiran dadi ukara pokok

c. Nggawe cengkorongan (rangkane pidhato)

d. Ngandharake pidhato kanthi migatekake cengkorongan kang wisditata.

Tata cara (metode) pidhato bisa katindakake kanthi :

a. Cara naskah

Pidhato kanthi cara iki migunakake teks utawa naskah kang diwaca kanthi langsung. Cara iki nduweni kekurangan, yaiku kaku amarga antarane pidhato lan pamiarsa ora bisa bebas anggone padha nyawang sarta lagu ukara (intonasi).

b. Cara apalan

Cara iki akeh digunakake dening wong kang nembe ajar pidhato yaiku kanthi cara nyawisake naskah (teks) banjur diapalake.

c. Cara impromptu

Cara iki rada bedha karo loro cara sadurunge yaiku pidhato ora nyawisake luwih dhisik bahan amarga wektune cumpen nanging kanthi adhedasar kapinteran, kawruh lan pengalaman kagiyatan micara bisa katindakake kanthi lancer.

d. Cara ekstemporan

Cara iki namung nganggo cathetan cilik kang isine balunganing karangan. Cara pidhato iki ora ngapalake tembung-tembung nanging bisa ngembangake nganggo basane dhewe.

v Tegesipun Pranatacara saha Pamedharsabda

Pranatacara asring sinebat master of ceremony (MC) pambyawara, pranata adicara, paranata titilaksana, utawi pranata laksitanibg adicara. Regeng, rancag, nges, lan botenipun satunggaling adicara seperangan ageng dados tanggel jawabipun pranatacara. Pranatacara inggih punika satunggiling paraga ingkang nggadhahi jejibahan nglantaraken titilaksana ing satunggiling upacara adat temanten, kesripahan, resmi/formal, pepanggihan, pasamuan, pengaosan, utawi pentas (show) , lan sapiturutipun. Upaminipun wonten ing tata upacara adat temanten Jawi pranatacara kajibah nglantaraken titi laksitaning adicara ijab, pawiwahan , lan panghargyan, sanadyan mekaten adicara ijab kadhang kala madeg piyambak boten kagarba kaliyan adicara pawiwahan lan panghargyan temanten. Ing upacara kasripahan juru paniti laksana nglantaraken tata upacara pangrukti utawa pametaking layon.

Pamedhar sabda inggih punika paraga ingkang kajibah mbabar satunggiling prekawis ( wacana ). Ing tata upacara panghargyan pamedharsabda mundhi dhawuhipun ingkang hamengku gati, upaminipun paraga ingkang kajibah ngaturaken pambagyaharja, utawi ingkang kajibah ngaturaken panuwun dhateng para takziah ingkang sampun ndherek bela sungkawa

(wakil kulawarga), atur pambela sungkawa wakil saking para takziah, utawa atur panglibur dhumateng kulawarga ingkang nandhang dhuhkita.

v Tatacara Pidato

Wonten salebeting pidato, sikep sarira ugi kedah dipun gatosaken supados saged mranani ingkang mirengakaken. Tuladhanipun sikep ingkang kirang meranani kadosta :

1. Jumeneng kanthi lelendhehan papan wicara

2. Jumeneng kanthi lelambahan setunggal suku.

3. Salira ngewah – ewahi ( nganeh – anehi)

4. Mbesengut

5. Asring ngebahaken satunggiling sarira.

6. nglebetaken sarira wonten ing sak celana..

7. Boten nggatosaken ingkang midhangetaken.

8. Asring ningali nginggil. Lan sapanunggalane

Wondene ingkang kedah dipun gatosaken inggih punika perkawis – perkawis kadosta :

1. swanten ingkang los saha mantep.

2. irama swanten kedah trep selaras kaliyan kawontenan

3. rancaking pamicara kedah selaras kaliyan tandha – tandha wicara.

v Kepriye Urutane Isi Pidato

Supaya bisa cetha lan narik kawigatene pamireng / audience, isine pidhato kudu ditata utawa diracik kanthi urutan kang tumata. Bab perangane isi pidhato , tuladha cengkorongan ( karangka ) kaya mangkene :

1. Uluk salam/ salam pambuka

2. Purwaka basa

a. Atur pakurmatan

b. Puji syukur dhateng ngarsaning Gusti ingkang Maha Kuwasa

c. Atur Panuwun / ngaturaken ayahan

3. Surasane basa / isi pidhato

4. Wasana Basa ( Ukara kang mungkasi pidhato)

5. Salam Panutup

v Tuladha Pidhato

1. Atur Pasrah pinanganten Kakung

Assalamu alaikum wr. Wb

Kasugengan saha sih nugrahaning Gusti ingkang akarya Loka mugi kajiwa lan kasarira wonten panjenengan sadaya lan kula amin

Pamjenenganipun Bapak ……….sekaliyan garwa ingkang kinurmatan, ingkang wonten kelengahan punika dipun salirani panjenenganipun Bapa………………ingkang pantes sinugata ing tata krani. Keparenga kula minangka talanging basa panjeneganipun Bapa………… sekaliyan garwa, ngabiyantara ( tepa ngapurancak) sowan wonten ngarsa panjenengan humiring putra temanten kakung anak mas…………………..dene wigatosing perlu nuninggih mekaten

Sepisan hangaturaken salam taklimipun panjenengan Bapa ………………sekaliyan garwa katur panjenenganipun Bapa…………………sekaliyan garwa dalasan sedaya kadang kulawarga.

Kaping kalihipun kinen hangaturaken sekar cempaka saksele nuninggih penganten kakung anak mas……………….mugi katampi kanthi renaning penggalih kanthi panyuwunan inggal kadhaupaken kalayan atmaja putrinipun bapa ……………………ingkang nama rara ayu…………..miturut adat widi widana ingkang lumampah wonten ing tlatah mriki. Kula sapengambyong namung jumurung karsa mugi tumapaking titi laksana rancag lancer tan manggih rubeda sinartan puji donga, mugi Gusti Allah ingkang Maha Agung tansah paring nugraha jejodhohan pinangaten kekalih.

Mekaten pepuntaning atur, jenang sela wader kali sesondheran, apuranta menawi lepat nyuwun pangapura. Waduk gajah mungkur wanagiri, menawi wonten kladhuking atur nyuwun agunging pangaksami.

Wassalamu alaikum wr.wb.

Assalamu alikum wr. Wb.

Panjenenganipun para sesepuh piniji sepuh ingkang satuhu kinabekten, para pepundhen ingkang hanggung mastuti dhumateng pepoyaning kautamen, langkung langkung dhumateng para pangemban – pamgembating praja ingkang pantes tinulad sinudarsana. sumrambah dhumateng para rawuh sadaya ingkang cinaket ing manah

Ngengeti panjenengan sadaya dalasan kula titah sawantah ingkang tansah kapurba kawasesa dening Gusti ingkang Maha Kuwasa, pramila sumangga panjenengan sadaya kula dherekaken hangunjukaken puja – puji syukur wonten ngarsa Gusti ingkang murba ing dumadi, awit berkah saha rahmatipun ingkang rumentah dhumateng panjenengan sadaya dalasan kula satemah ing ari kalenggahan punika panjenengan sedaya lan kula saged kempal manunggal wonten ing dalemipun Bapa……………..tan manggih rubeda tuwin sambikala.

Para rawuh ingkang satuhu sulistyaning budi.

Keparenga kula ing mriki minagka sesulihipun panjenengan bapa…………….ingkang ari kalenggahan punika nembe hanetepi darmaning sepuh nuninggih amarhargya putra amiwaha siwiputra putrinipun ingkang nama risang Bagus………………………..jinatu krama dening rara ayu ……………..atmaja putrinipun bapa ………………….ingkang lenggah pidalem ing ………………wondene tumapaking ijab qobul sampun lumampah rikala dinten ……………surya kaping …………………..wonten ing KUA……………kanthi pranatan agami islam.

Wondene wosing gatos panjenengan sadaya katuran rawuh wonten ing dalem mriki boten sanes badhe kasuwun idi pangestunipun sambet kalayan hajatipun bapa……………. Kalawau.

Sumber: Blog Kangsura

Friday, December 28, 2018

Wacana Sesorah 2

A. Katrangan

Sesorah utawa pidhato iku sawijining kaprigelan micara. Sesorah menika wicara utawa nglairake gagasan, panemu sarana lisan ing sangarepe wong akeh. Gamblange wedharing pangandikan nduweni tujuan kang gumathok. Sing diarani wong akeh iku ora ana watese. Udakara luwih saka wong sepuluh. Tujuan / ancase pidhato/sesorah yaiku :
1. Kanggo maringi pangertosan/informasi marang wong liya sing ngrungokake pidhato/sesorah.
2. Kanggo maringi panglipur/hiburan marang wong liya sing ngrungokake sesorah.

B. Jinising Sesorah

1. Sesorah cara apalan
Sesorah cara apalan inggih menika sesorah ingkang sakderengipun sampun damel seratan pidhato lajeng dipun apalaken tembung ngantos ukaranipun presis kaliyan seratan.
2. Sesorah cara naskah / teks
Sesorah cara naskah / teks inggih menika sesorah ingkang juru pamedhar sabda saestu bekta naskah lajeng dipun waos sawetanipun. Cara menika asring dipun ginakaken dening para pejabat utawi punggawaning nagari.
3. Sesorah cara dadakan / improve
Sesorah cara dadakan / improve inggih menika cara pidhato mboten kanyana-nyana sakderengipun menawi badhe dipun aturi pidhato utawi ndadak ing adicara menika lajeng dipunaturi pidhato.
4. Sesorah cara ekstemporan
Sesorah cara ekstemporan inggih menika cara pidhato, juru pamedhar sabda ngasta utawi damel cathetan alit mideningka gaman utami pangemut-emut urutaning ingkang badhe dipun pangendikakaken. Cathetan wau namung wos-wos utawi garis ageng ingkang badhe dipun aturaken.

C. Urut-urutaning Sesorah

1. Uluk salam, yaiku ngaturaken salam sing sepisan. Lumrahe nggunakake tembung Assalamu’alaikum Wr. Wb. Liyane kuwi nggunakake tembung kula nuwun.
2. Purwaka, yaiku atur panuwun dhumateng para tamu lan ngaturake atur syukur marang Gusti kang Maha Agung
3. Isi, yaiku kabeh perkara kang diwedharake. Isi sing apik kudu diwedharake kanthi cetha.
4. Wigati / dudutan / kesimpulan, yaiku inti saka isi kang wis diwedharake.
5. Pangarep-arep, yaiku pituduh-pituduh lan pangarep-arep sing diwedharake marang wong kang ngrungokake.
6. Wusana, yaiku atur panuwun lan nyuwun ngapura, manawa ana kekurangane, ana kaluputane (nglenggana nduweni luput) nalika ngaturake sesorah.
7. Salam panutup, yaiku ngaturake salam kanggo mungkasi sesorah. Menawa agama Islam lumrahe Wassalamu’alaikum wr. wb. Saliyane iku matur nuwun utawa nuwun.

D. Etika Sesorah

1. Patrap utawi sikap
- Trengginas, tanggap, manteb lan luwes
- Wibawa, mboten inggih-inggih menapa malih ajrih
- Ngadeg kedah jejeg, mboten cepengan, mboten dhoyong utawi lendhetan

2. Busana
- Busananipun dilarasaken kaliyan kawontenan, uripun sampun ngantos kasar prabawa utawikepara nyolok mata.

3. Basa lan Sastra
- Basanipun mboten dakik-dakik ingkang tetembungan dereng utawi mboten dipun mangertosi tiyang kathah.
- Dene basa ingkang trep ugi ngengeti tuntunaning paramasastra ingkang leres, pamilihing tembung, pangrakiting ukara, laguning ukarang ingkang cetha, kendho-kencenge, inggil andhape, cepet lindhike lsp.
Tuntunan sesorah saha panata Titi Laksana Prasaja,
Drs. Sutardja Atmasandjaja

Tuesday, December 18, 2018

Lamaran Penganten

Lamaran inggih punika rerangken tata cara parapara ingkang badhe bebesanan, salajengipun badhe tumuju dhateng tata cara pawiwahan adat Jawi. Tata cara lamaran punika minangka tata trapsila lan subasitaning bebrayan.

Tata cara sanesipun ingih punika:

Ningseti utawi atur srahsrahan sanggan,
Siraman,
Malem midodareni,
Ijab, tuwin
Upacara dhaup.

Leresipun ingkang nindakaken panglamar punka inggih tiyang sepuhipun putra kakung piyambak. Limrahipun, tiyang sepuhipun putra kakung lajeng ngresaya kulawarganipun ingkang cinaket supados nindakaken panglamar.

Putra kakung mboten prelu ndherek wonten ing panglamaran. Sedaya kala wau namung kangge ngawekani mbok bilih lamaran kalawau dipuntolak, ingkang tamtu sanget damel lingsemipun kulawarga utawi putra kakung piyambak.

Amargi tata cara lamaran namung mujudaken pepanggihan tiyang sepuhipun putra kakung tuwin tiyang sepuhipun putri kemawon, tata cara lamaran saged dipun tindakaken kanthi prasaja, mboten kedah mawi upacara utawi ugi mboten prelu wonten pranata adicara.

Monday, December 17, 2018

Ancer Ancer Pakaryan Pranatacara

Supados saged pikantuk kasil pakaryan ingkang sae, kedah kagungan pathokan-pathokan kangge nindakake pakaryan pranatacara saha pamedhar sabda punika.

Pathokan-pathokan wau inggih punika:

Ing abagan basa, mugi kaginakaken basa ingkang trapsila, wijang prasaja ananging gampil katampi dening para tamu (ingkang midangetaken), serta sakeca kapiarsa.
Tanggap ing kawontenan, supados pahargyan saged regeng.
Mangertosi rantaman-rantaman badhe tumapaking adicara kanthi permati, sarta kedah tanggap ing kawontenan.
Mangertos asma-asma para paraga ing saklebeting pawiwahan kanthi jangkep sak imbuhanipun.
Tansah sesambetan kaliyan kadang pranata pita swara, supados nyamektakaken gendhing gendhing ingkang jumbuh kaliyan lalampahing adicara.
Tansah sesambetan kaliyan poranparaning pawiwahan (ketua Panitia), supados enggal mangertosi mbok bilih wonten ewah-ewahan adicara.
Trengginas mutusaken samukawis murih pawiwahan mboten katingal kisruh.

Menawi pathokan-pathokan ing nginggil punika kagem lan babagan pasugatan sarta peladosanipun ugi rancag, Insya Allah pawiwahan badhe lumampah kanthi sae jumbuh kaliyan ingkang dipun idham-idhamaken dening ingkang hamengku karya.

Wednesday, December 12, 2018

Naskah Pidato Bahasa Jawa

Bapak Kepala sekolah ingkang kinurmatan.

Bapak, Ibu Guru saha Karyawan ingkang satuhu luhuring budi.

Para kanca, siswa-siswi ingkang kula tresnani.

Para rawuh ingkang satuhu kinabekten

Sumangga langkung rumiyin sami ngaturaken syukur dhumateng Gusti Maha kuwasa ingkang kepareng paring rahmat lan hidayahipun. Kita sadaya taksih saged kempal manunggal kanthi tentrem, bagas, waras, kebak ing kabagyan salebetipun adicara punika.

Dumateng ngarsanipun para rawuh sadaya ingkang kula hormati, keparenga kula ngudhar pemanggih babagan anggenipun tiyang sami ngginaaken basa Jawi wonten ing pagesangan sadinten-dinten.

Sinaosa langkung saking 75.000.000,- warga Indonesia ngginaaken basa Jawi minangka basa pasrawungan, mboten ateges basa Jawi saged ngrembaka lan dipunkembangaken aggenipun ngginaaken kanthi sae. Wonten pemanggih saking para sarjana lan sujana ingkang paring kawigatosan dhumateng basa Jawi, bilih basa Jawi menika saestu langkung angel katimbang basa-basa sanesipun. Basa sanesipun awis-awis ingkang ngecakaken langkung saking setunggal standar. Wonten ing basa Jawi standar basa menika wonten tiga, inggih menika Ngoko, Krama Madya lan Krama Inggil.

Kajawi menika para sarjana lan sujana ingkang kajibah damel rantaman kurikulum pawiyatan, kathah-kathah ugi sampun mboten kesengsem malih nglebetaken basa Jawi wonten kurikulum, kanthi alesan basa jawi menika simbol feodalisme lan adamel wates pacelathon antawisipun kaneman lan kasepuhan, kathah pemanggih ingkang mboten saged dumugi awit radin-radin para nem-neman sami ajrih matur dhumateng tiyang sepuh, menawi magertosi piyambakipun mboten saged ngginaaken Krama Inggil kanthi sae.

Mekaten sekedhik atur kula babagan basa Jawi wonten ing pagesangan sadinten-dinten, cekap semanten atur kula.

Nuwun.

Sumber Berita Lampung:

Pidato dalam kehidupan sehari-hari Naskah Pidato Bahasa Jawa Krama

Wednesday, October 12, 2011

Naskah Pidato Bahasa Jawa

Bapak Kepala sekolah ingkang kinurmatan.

Bapak, Ibu Guru saha Karyawan ingkang satuhu luhuring budi.

Para kanca, siswa-siswi ingkang kula tresnani.

Para rawuh ingkang satuhu kinabekten

Dumateng ngarsanipun para rawuh sadaya ingkang kula hormati, keparenga kula ngudhar pemanggih babagan anggenipun tiyang sami ngginaaken basa Jawi wonten ing pagesangan sadinten-dinten.

Mekaten sekedhik atur kula babagan basa Jawi wonten ing pagesangan sadinten-dinten, cekap semanten atur kula.

Nuwun.

Sumber Berita Lampung:

Pidato dalam kehidupan sehari-hari Naskah Pidato Bahasa Jawa Krama

Wednesday, December 15, 2010

Tanggap Wacana

Padha dirungokake utawa disemak bab tanggap wacana iki pamrihe upama ngelakoni ora bakal nunak-nunuk. Tanggap wacana iku aweh tanggapan utawa tembung liyane sambutan marang sawijining kaperluan. bakune ndherek menawa lagi nandang reribet.

Dene urut-urutane wong pidhato iku kurang luwih mangkene:

1. Salam pambuka

2. Purwaka atur pakurmatan lan atur panuwun marang para tamu undhangan

3. Ngaturaken rasa syukur marang Gusti

4. Wose utawa wigatine perlu

5. Pangarep-arep pamuji karahayon

6. Wasana utawa panutup

Monday, December 6, 2010

Pranatacara lan Sesorah

PRANATACARA LAN SESORAH

Sugeng rawuh Ing adicara gladen Sesorah lan Pranatacara

Pranatacara : Asring dipun sebat Master Of Ceremony, Pambiwara, Pranata adicara, Pranata titi laksana, Pranata Laksitaning Adicara: Paraga ingkeng tinanggenah nata cara utawi acara, bakuning ayahan nglantaraken cakcakaning acara utawi adicara wonten ing pepanggihan, pasamuwan ingkang sampun rinantam.

Pranatacara nyepeng ayahan ingkeng ageng, dados punjering kawigatosan, amargi regeng, rancag, nges lan mbotenipun satunggaling adicara saperengan ageng dados tanggel jawabipun pranatacara.

Soksintena kemawon para paraga ingkeng magepokan kaliyan lampahing adicara utawi pawiwahan boten saged tumindak piyambak-piyambak menawi dereng wonten atur saking pranatacara.

Sejatosipun pakaryan pranatacara mekaten sanes setunggiling pakaryan ingkeng awrat, awit saksintena kemawon priyantun ingkang mboten nandang tuna wicara utawi ingkeng kedaling lesan mboten cetha, tamtu saget nindakaken pakaryan pranatacara kasebut. Ananging ingkeng kathan sami ajrih dhumateng tuna dungkaping basa. Ananging babagan menika mboten ndadosaken pepalang, amargi basa mekaten kathah sanget pocapanipun, pramila setunggal lan sanesipun priyantun saged ngginakaken basa ingkeng pundi kemawon, jer leres pikajenganipun cak cakanipun, saha gampil kasuraos deneng saksintena ingkeng midangetaken.

Ancasipun Sesorah Munapadene Pranatacara

Kangge nyaosi pengertosan dumateng tiyang sanes

Kangge nyaosi karemenan dhumateng ingkeng kepareng midhangetaken

Kangge paring pemanggih utawi pendirian ingkeng mirengaken supados kersoa tumindak ingkeng dipun suwun dening pamedhar pangandikan

Amrih Dados Pranatacara Saged Lumampah Sae

Swara

Busana (Ageman)

Subasita (Trapsila)

Basa lan Sastra

Swara

Kedaling lesan kedah kagladhi, supados saged langkung cetha medaling suwanten. Pranatacara saha pamedhar sabda kedah saged mapanaken utawi ngginakaken swanten ingkeng awrat, cekapan, utawi inggil trep kaliyan swasana.

Pangolahing suwanten, kedah wajar, cetha, teges boten ketawis sanget menawi dipun olah kanthi (hiperbola)

Inggih babagan swanten menika, pranatacara saha pamedhar sabda kedah wigatos dhateng swaraning aksara swara (ucapan), langkung-langkung beda-beda mingsad-mingsedipun ing tembung lingga saha tembung andhahan.

Wirama (lagu) ugi kedah kagladhi kanthi saestu supados sekeca dipun mirengaken. Kados pundi rindhik rikatipun, mandhap minggahipun, sampun ngantos kesesa, ananing ugi sampun ngantos nglentreh sanget.

Galadhi olah swara punika kedah pikantuk kawigatosan ingkeng mirunggan, amargi punika dados satunggiling sarat baku kagem pranatacara saha pamedhar sabda.

Busana (Ageman)

Ajining raga gumantung busana, mila babagan busana punika ugi kedah pun gladhi saengga jejibahan pranatacara saha pamedhar sabda saged kalaksanakaken kanthi sae

Anggenipun ngadi busana kedah kajumbuhaken kaliyan keperluanipun wonten ing upacara punapa ingkang badhe dipun ayahi.

Jejering pranatacara saha pamedhar sabda saged katingal ngrengreng menawi rinengga ing swanten, raga lan busana ingkeng pantes.

Pangudining busana saged ngetrapaken kaliyan rupi utawi wernining busana kaliyan kulit, ugi make up, saengga katingal pantes kaliyan papan panggenan , boten nyolok tuwin samadya kemawon

Subasita (trapsila)

Trapsila (tata krami) kedah pun gladi ingkeng sae, amargi trapsila ingkeng kirang, saged ngirangi kawibawanipun pranatacara saha pamedhar sabda

Solah bawa sampun ngantos kadamel-damel . Langkung sae bilih solah bawanipun prasaja kemawon, anteng, manteb ananging boten kaken (Kaku)

Ewah-ewahanipun pasuryan ugi kedah kaudi ingkeng sedaya wau sageda nggambaraken isining penggalih, ingkeng lajeng jumbuh kaliyan swasana. Kadosta, bilih wonten ing pawiwahan saha pahargyan pasuryan bingar, sumringah lan ramah awit prastawa menika wau ngemu suraos suka, kabagyan, saha kabingahan.

Wondene menawi wonten ing sripah, pasuryan kedah boten ketingal bingar, utawi sumringah, amargi punika tamtu boten jumbuh kaliyan swasana saha raos manah kulawarga ingkeng nembe nandhang duhkita utawi duka sungkawa.

Basa Lan Sastra

Basa lan sastra ngawujudaken kabetahan ingkang baku tumrapipun priyantun ingkang nembe ngayahi tugas utawi jejibahan dados pranatacara saha pamedhar sabda

Basa ingkang kaginakaken kedah miturut tuntunaning sastra ingkeng leres. Pamilihing tembung, ingkeng lajeng dipun ronce dados ukara kedah trep, luwes, sae, wusana sekeca kamirengaken ing asanes.

Kanthi pangertosan pranatacara saha pamedhar sabda saged ndapuk mocap, tembung, ukara saha wacana kanthi leres tuwun laras.

Laras tegesipun pranatacara sahapamedhar sabda saged ngrantam saha mbabar titilaksana trep kaliyan kawontenan saha swasana

Leres tegeipun pranatacara saha pamedhar sabda saged ngginakaken basa ingkeng trep kaliyan paramasastranipun.

Ingkeng menika pranatacara saha pamedhar sabda saget lumebet ing pawiyatan utawi saged maos piyambak buku-buku ingkang ngemot kawruh paramasastra kasebat.

Supados saged pikantuk kasil pakaryan ingkeng sae,kedah kagungan pathokan-pathokan kangge nindakaken pakaryan pranatacara saha pamedhar sabda punika

Ing abagan basa, mugi kaginakaken basa ingkeng trapsila, wijang prasaja ananging gampil katampi dening para tamu (ingkeng midangetaken) sarta sakeca kapiarsa

Tanggap ing kawontenan, supados pahargyan saged regeng

Mangertosi rantaman-rantaman badhe tumapaking adicara kanthi permati, sarta kedah tanggap ing kawontenan

Mangertos asma-asma para paraga ing salebeting pawiwahan kanthi jangkep sak imbuhanipun

Tansah sesambetan kaliyan kadang pranata swara, supados nyamektakaken gendhing ingkang jumbuh kalihan lampahing acara

Tansah sesambetan kaliyan poranparaning pawiwahan (ketua panitia) supados enggal mengertosi mbok bilih wonten ewah-ewahan adicara

Trengginas mutusaken samukawis murih pawiwahan boten ketinggal kisruh

Sikap sarira ingkang kirang mranani

Jumeneng kanthi lelambaran suku setunggal

Jumeneng kanthi suku sakelengkung rapet

Jumeneng kanthu suku sakelangkung mekar

Jumeneng kanthi loyo/ boten wonten semangat

Jumeneng kirang imbang

Jumeneng kanthi lelendhetan papan wicara

Ngewah-ewah sarira

Jumeneng boten jenjem

Jumeneng kaku

Jumeneng mboten nggatosaken papan panggenan

Ewah-ewahan pasuryan ingkang boten mranani

Gumujeng ingkang dipun damel-damel

Asring mesem

Mbesengut

Tumungkul

gugup

Ewah-ewahan sarira ingkang boten mranani

Asring ngebahaken satunggaling perangan sarira

Ngebahaken perangan sarira kanthi tidha-tidha

Ngebahaken perangan sarira kanthi boten trep kaliyan ingkang dipun ngendikakaken

Asring ngukur talingan

Nglebetaken asta wonten ing sak clana

Asring mirsani cathetan

Asring ningali nginggil

Boten nggatosaken ingkeng midhangetaken

Sesorah lan pranatacara ugi kedah migatosaken babagan

Sora lan botenipun suwanten

Iramaning swanten

Swasananing suwanten ingkeng laras kaliyan kawontenan

Tanggap wacana kedah kamot perkawis ingkang sampun urut

Salam pambuka

Purwaka

Wigati (kesimpulan)

Pangajeng-ajeng

Wusana/purna/Akhir/Entek-entekan

Katerangan Urutaning Tanggap wacana

Salam pambuka: inggih punika ngaturaken salam ingkeng sepisan, kadosta, assalamualaikum…wr…wb…salam sejahtera untuk kita semua

Purwaka: inggih menika atur matur nuwun dhumateng para tamu undangan saha atur syukur dhumateng Alla Swt, dlsb

Isi: inggih menika sedaya perkawis ingkeng dipun wedharaken

Wigati: inggih menika inti saking ingkang sampun dipun wedharaken

Pangajeng-ajeng: inggih punika pitedah-pitedah saha pangejeng-ajeng ingkang dipun wedharaken dhumateng para ingkang midhangetaken

Wusana: inggih punika, atur panuwun saha nyuwun pangapunten bilih wonten kekirangan saha kalepatan anggenipun ngaturaken tanggap wacana.

Friday, December 3, 2010

Wacana Sesorah

Nulis wacana kanggo sesorah, kang perlu digatekake ing antarane:
1. Pembuka

Salam

Syukur

Ngenalake

Ancas/tujuan sambunge karo irah-irahan

2. Isi

Bab-bab kang ndadekake pamikiran (masalah)

Kira-kira kang njalari apa (penyebab)

Carane mrantasi (jalan Keluar)

3. Panutup

Ringkesan Sesorah

Nglenggana kekurangane

Nyuwun pangapura kabeh kekurangan/klerune

Salam panutup

Tuladha gawe cengkorangan sesorah:
Gagasan buku: Pengetan Dina Kartini
a. Purwaka

Salam

Syukur

Ngelingake kewajibane remaja putri nerusake perjuangane R.A. Kartini.

b. Akeh warga kang tumindak ora nganggo tatanan

Kang tumindak tanpa tatanan ora mung para priya, nanging uga para wanita.

Kira-kira kang njalari tumindak tanpa tatanan.

c. Ngawekani tumindak tanpa tatanan

Remaja putri kudu melu mikirake.

Remaja putri kudu wani tumindak gawe tuladha kabecikan.

Tuladha tumindak becik.

d. Dudutan

Ringkesan sesorah

Panyuwun marang kang disesorahi

Salam

wong jowo

Monday, December 31, 2018

Sanggan, Paningset Saha Lambang Kalpika

Pidhato

Friday, December 28, 2018

Wacana Sesorah 2

Tuesday, December 18, 2018

Lamaran Penganten

Monday, December 17, 2018

Ancer Ancer Pakaryan Pranatacara

Wednesday, December 12, 2018

Naskah Pidato Bahasa Jawa

Wednesday, October 12, 2011

Naskah Pidato Bahasa Jawa

Wednesday, December 15, 2010

Tanggap Wacana

Monday, December 6, 2010

Pranatacara lan Sesorah

Friday, December 3, 2010

Wacana Sesorah

Flickr Images

Like us on Facebook